O Pastoricense xuvenil recibe á Pontenova tras facerse oficial o seu liderado

A Federación de Fútbol confirmou onte a victoria do Pastoricense no partido disputado o martes de Entroido ante o Cospeito tras a alienación indebida deste último. Con estes tres puntos, confírmase que o equipo da Pastoriza é o líder da categoría e depende de sí mesmo para facerse co campionato nas cinco xornadas que faltan.

O sábado, ás 17.00 horas, o Acebreiro será protagonista do duelo entre o Pastoricense e o Sporting Pontenova. O equipo dirixido por Raúl tentará sumar os tres puntos para seguir mantendo a primeira posición, a espensas do que faga o San Ciprián na súa visita ao colista, o Ribadeo, e o Foz ao Lourenzá. O cuarto clasificado, o Sagrado Corazón, recibe ao Alfoz.

A falta de cinco xornadas para o remate do campionato calquera fallo pode ser xa definitivo polo que o equipo pastoricense tratará de acadar unha victoria ante un rival, a Pontenova, que ocupa o 11º posto na liga con 21 puntos, nunha tempada de transición despois dos éxitos colleitados nos últimos anos. Raúl poderá contar en principio con todos os xogadores para afrontar este choque.

Facendo unha análise dos partidos que quedan para os catro equipos que se atopan nos postos altos da táboa confiamos en que o Pastoricense sexa quen de sumar os quince puntos que restan, o que lle daría o primeiro posto e a opción de disputar a fase de ascenso a Liga Galega.

Ao Pastoricense os partidos que lle quedan na casa son Pontenova, Viveiro B e San Ciprián, na última xornada onde se pode decidir o campionato, e como visitante os complicados campo de Alfoz e Burela, sétimo e quinto clasificado, respectivamente. Unhas saídas duras onde o equipo da Pastoriza deberá demostrar o seu potencial.

O San Ciprián, segundo, contará con catro partidos como visitante nos cinco restantes, un factor que pode ser determinante aínda que o equipo mariñán non baixa o seu potencial xogando fóra do seu campo polo que haberá que agardar a disputa dos mesmos para sacar conclusións. Así ao equipo de San Cibrao réstalle Ribadeo, Pol, Cospeito e Pastoricense, como visitante, e recibirá na penúltima xornada ao Sagrado, outro equipo que disputa o campionato. Un factor determinante é que o San Ciprián deberá xogar ante Sagrado e Pastoricense nas dúas últimas xornadas.

O Foz, terceiro, conta cun punto menos na clasificación que Pastoricense e San Ciprián, conta cun calendario máis asequible. O máis complicado serán as visitas que ten que facer aos campos do Lourenzá, Pol e do Sagrado Corazón, na última xornada de liga. Como local recibirá a Ribadeo e Cospeito, a priori onde sumará os tres puntos. O golaverage con Pastoricense está empatado polo que haberá que mirar o xeral no caso dun empate a puntos. Na actualidade o equipo da Pastoriza conta con +38 e o Foz con +31. O San Ciprián ten +36 e o Sagrado Corazón +34. A igualdade entre os catro equipos constátase ata na diferencia de goles encaixados e marcados. Contra o Sagrado, o Pastoricense tamén ten o golaverage empatado polo que se miraría o xeral tamén.

Por último, o Sagrado Corazón, cuarto, a tres puntos do liderado, conta coa desventaxa da diferenza de puntos e tamén con que se enfrontará a catro dos sete equipos que ocupan os primeiros postos. Como local recibirá a Alfoz, Burela e Foz e como visitante Viveiro B e San Ciprián. Cremos que o equipo da capital lucense conta con menos opcións de acabar a liga no primeiro posto pero ao mesmo tempo tamén lle damos o papel de xuíz na pelexa pois de sumar os puntos ante os rivais directos pode dilucidar o campionanto para un ou outro lado.

Con este plantexamento, apostamos claramente polo Pastoricense como equipo favorito e candidato ao campionato e agardemos que así sexa. Forza Pastoricense!!