O Pastoricense xuvenil sitúase líder tralo empate entre Foz e San Ciprián

O equipo xuvenil da U.D. Pastoricense levantouse esta mañá co liderado da Liga Autonómica Xuvenil tralo empate que colleitaron onte Foz e San Ciprián, segundo e primeiro respectivamente ata o encontro disputado. O equipo da Pastoriza gañou o seu encontro por 3-0 ante a incomparecencia do Xove Lago, aqueixado de numerosas baixas por sanción tralo partido anterior.

Así, a U.D. sitúase no máis alto da clasificación con 43 puntos, os mesmos que o San Ciprián, e un máis que o Foz, terceiro clasificado. Tanto Pastoricense como San Ciprián contan cunha diferencia de goles de +35 pero o equipo chairego conta con máis goles ao seu favor, factor que lle da o liderado. O Sagrado Corazón, cuarto, conta no seu haber con 40 puntos. Estes catro equipo parece que van ser os que pelexen até o final, nas seis xornadas que restan, para facerse co primeiro posto, que da opción de disputar a fase de ascenso a Liga Galega.

Para poñer máis emoción ao mesmo, hai que destacar que a última xornada de liga, se todo se mantivera así de emocionante, sería a traca final pois os enfrontamentos serían Pastoricense-San Ciprián e Sagrado Corazón-Foz.

Agora o equipo dirixido por Raúl tentará sumar todos os puntos que lle quedan ata a última xornada e xogarse o primeiro posto ante o San Ciprián, na casa. Agardemos que se cumpran os nosos obxectivos.