O Pastoricense vence por 1-0 á Pontenova pero perde o liderato polo golaverage xeral

O Pastoricense xuvenil venceu  esta tarde ao Sporting Pontenova por 1-0 cun gol de Iván Seco. Con estes tres puntos o equipo da Pastoriza continúa empatado a puntos co San Ciprián que goleou por 0-4 ao colista Ribadeo. A diferenza de goles no golaverage xeral sitúa ao equipo mariñán outra vez como líder ao contar cunha diferenza de +40 fronte ao Pastoricense que conta con +39.

Pola súa banda, o terceiro clasificado, o Foz, tamén sumou os tres puntos na súa visita ao campo do Lourenzá por 1-2. E o Sagrado Corazón, cuarto, facía o propio ante o Alfoz por 5-1. Con estes resultados, as diferenzas entre os catro primeiros son as mesmas a falta dunha xornada menos, quedando neste momento catro para que remate a liga.

No partido do Pastoricense, o cadro local saltou ao terreo co seguinte once: Reina, Dani, Diego López, Iago, Aníbal, Javi, Canuto, Diego, Fernando, Iván e Joni. Tamén xogaron: Simón e Cali. O gol foi obra de Iván Seco, que despois de varias xornadas sen marcar, batía ao cancerbeiro rival.

A vindeira semana os enfrontamentos serán os seguintes: o líder, o San Ciprián, visita o campo do Pol; a U.D. Pastoricense xogará no campo do Alfoz; o Foz recibe ao colista Ribadeo; e, por último, o Sagrado Corazón viaxará a Viveiro para enfrontarse ao equipo local. Unha xornada na que pode ir marcándose un pouco o futuro, sobre todo, se o San Ciprián e Pastoricense vencen en dous dos desplazamentos máis complicados que lles quedan.